ဆင်ခြင်အောက်မေ့ခြင်းဆိုတာဘာလဲ

အကြောင်းအရာတစ်ခုကို သေချာစွာ စနစ်တကျ စဉ်းစားတွေးတောခြင်း ဖြစ်သည်။ ကျမ်းပိုဒ်တစ်ပိုဒ်ကို နားလည်လာရန် လက်တွေ့အကျိုးရှိဖို့အတွက် ရှုဒေါင့်အမျိုးမျိုးမှနေပြီး စဉ်းစားတွေးတောခြင်း ဖြစ်သည်။ စိတ်ကူးနေခြင်းမဟုတ်၊ ဟိုတွေးဒီတွေး လိုက်လျှောက်တွေး နေခြင်းလည်း မဟုတ်ချေ။
ဒေါက်တာ ဟာဘတ်မစ်ချာ (Dr. Hubert Mitchell) ဆိုသော လူတစ်ဦးသည် အိန္ဒိယ ပြည်မှာ များစွာအမှုတော်ဆောင်ပြီး ချောင်းနံဘေးမှာရှိသော နွားများကို လေ့လာခဲ့သည်။ နွားများ စားမြုံ့ပြန်တာကို လေ့လာခဲ့သည်။ နွားများတွင် အစာအိမ် (၄) ခန်း ပါရှိပါသည်။ နွားများ အစာစားပြီး အစာချေသောအခါ (၅၅)စက္ကန့်ကြာကြောင်း တွေ့ခဲ့သည်။ နွားများသည် အစာများကို ဦးစွာမျိုချပြီးမှ နည်းနည်းပြန်ထုတ်သည်။ နောက်ပြီး (၅၅) စက္ကန့် ဝါးပြီးမှ ပြန်မျိုချရာ အစာအိမ် ဒုတိယအခန်းအထိ ရောက်သွားပြီးလျှင် နောက်တစ်ခါ နည်းနည်း ထုတ်ပြီး (၅၅)စက္ကန့် ဝါးပြီးမျိုချလိုက်ပြန်သည်။ အထက်ပါအတိုင်း ဆက်ပြီး နည်းနည်းဆီ ထုတ်လိုက် (၅၅) စက္ကန့် ဝါးပြီးမျိုချလိုက်နှင့် အစာကြေကုန်တဲ့အထိ ပြုလုပ်သည်။ ဤကဲ့သို့ အစာကို နည်းနည်းစီထုတ်ပြီး အစာချေလိုက်သောအခါ အဟာရဓာတ်များ သွေးသားဖြစ်လာ သည်။ တနည်းအားဖြင့် ဝါးပြီးသားအစာသည် အစာအိမ်အခန်းများသို့ ရောက်သွားပြီး ထိုမှတဆင့် သွေးကြောထံသို့ရောက်သွား၍ အားရှိလာသည်။ ထိုနည်းတူ နှုတ်ကပတ်တော်ကို ကျက်မှတ်ပြီး ပြန်လည်စဉ်းစားဆင်ခြင်အောက်မေ့ခဲ့သော် ကျွန်ုပ်တို့၏ ဝိညာဉ်ရေးရာ ကြီးထွားရင့်ကျက်လာပြီး အားပြည့်လာပါမည်။
လူတစ်ယောက် အစာမကြေလျှင် ဝမ်းဖောဝမ်းရောင် ဖြစ်တတ်သည်။ အားတိုးဆေး သောက်ပေမယ့် အားမရှိခြင်းသည် အစာမကြေတဲ့အတွက်ဖြစ်သည်။ အစာကြေလျှင် ရောဂါ ဖြစ်သည်။ ထိုနည်းတူ နှုတ်ကပတ်တော် များစွာဖတ်ရှုလေ့လာပြီး စဉ်းစားဆင်ခြင်အောက်မေ့ခြင်း မရှိခဲ့သော် ဝိညာဉ်ရေးရာ ရောဂါအမျိုးမျိုးရတတ်သည်။ ဝိညာဉ်ရေးရာ၌ အသိတရား များပြီး လက်တွေ့မလိုက်လျှောက်နိုင်တဲ့အခါ စိတ်ဓာတ်ကျခြင်း၊ စိုးရိမ်ပူပန်ခြင်း၊ စိတ်ပျက်ခြင်း စတဲ့ ရောဂါများရနိုင်ပါသည်။ ဘုရားသခင်၏ နှုတ်ကပတ်တော်ကို စဉ်းစား ဆင်ခြင်အောက်မေ့သောသူသည် နှုတ်ကပတ်တော်၌ မွေ့လျော်ခြင်းရှိ၍ စိတ်ဓာတ်ကျခြင်း၊ စိတ်ပျက်ခြင်းနှင့် ကင်းဝေးပြီး ဝမ်းမြောက်ရွှင်လန်းမှု ရရှိသည်။ မင်္ဂလာရှိသော အသက်တာဖြစ်သည်။ အချိန်တန်လျှင် အသီးသီးသော အသက်တာဖြစ်သည်။ ပြုလေသမျှ အောင်မြင်သော အသက်တာလည်း ဖြစ်သည်။ (ဆာ၊ ၁း၂-၃)

ဆင်ခြင်အောက်မေ့ရန်နည်းလမ်း
(၁) ဆင်ခြင်အောက်မေ့လိုသော ကျမ်းပိုဒ်တွင်ပါဝင်သော အဓိကစကားလုံးများကို ဂရုစိုက် စဉ်းစားကြည့်ပါ။
(၂) ထိုကျမ်းပိုဒ်ကို သင်နားလည်သလို စကားပြေ ပြန်ရေးကြည့်ပါ။
(၃) အခြားကျမ်းညွှန်း၊ ကျမ်းပိုဒ်များနှင့် နှိုင်းယှဉ်၍ စဉ်းစားဆင်ခြင်ကြည့်ပါ။
(ဥပမာ-ဟေရှာယ၊ ၂၆း၃ ကို ၁ပေ၊ ၅း၇။ ဖိ၊ ၄း၆-၇။ မ၊ ၁၁း၂၈။ ဆာ၊ ၁၁၉း၁၆၅
တို့နှင့် နှိုင်းယှဉ်စဉ်းစားကြည့်ပါ။)
(၄) သင် ဆင်ခြင်အောက်မေ့နေသော ကျမ်းပိုဒ်အားဖြင့် သင့်အသက်တာ၌ မည်သို့ လက်တွေ့လိုက်နာကျင့်သုံးနိုင်မည်ကို စဉ်းစားပါ။
(၅) ဆင်ခြင်အောက်မေ့ခြင်းမပြုမီနှင့် ပြုနေစဉ်တစ်လျှောက်လုံး ဆုတောင်းလျက် လုပ်ဆောင်ပါ။